Enn verður bið á því að landsliðsfyrirliðinn Aron Einar Gunnarsson leiki með nýliðum Cardiff í ensku úrvalsdeildinni í knattspyrnu á þessu tímabili.
Neil Warnock knattspyrnustjóri Cardiff greindi frá því á vikulegum fréttamannafundi í morgun að Aron Einar hafi aftur orðið fyrir meiðslum á æfingu í vikunni og hann muni ekki taka þátt í leiknum gegn Englandsmeisturum Manchester City á morgun en liðin eigast við á heimavelli Cardiff.
Aron Einar hefur verið að glíma við meiðsli í hné en fyrir leikinn á móti Chelsea um síðustu helgi sagði Warnock að Aron gæti hugsanlega spilað en ekkert varð af því.
Landsliðsfyrirliðinn hefur ekkert spilað frá því hann lék með íslenska landsliðinu í lokaleiknum gegn Króötum í riðlakeppni HM í Rússlandi og var hans sárlega saknað í leikjunum á móti Svisslendingum og Belgum í Þjóðadeild UEFA.