Biður um að vera seldur til Arsenal

Ekvadorski knattspyrnumaðurinn Moises Caicedo hefur beðið enska félagið Brighton um að taka tilboði Arsenal og selja sig þangað.

Brighton hafnaði 60 milljón punda tilboði í hinn 21 árs gamla miðjumann frá efsta liði ensku úrvalsdeildarinnar og forráðamenn félagsins segja að hann verði ekki til sölu fyrr en í sumar.

Caicedo skrifaði á Instagram í gærkvöld að hann væri afar þakklátur því tækifæri sem Brighton veitti honum, að spila í ensku úrvalsdeildinni.

„Ég hef alltaf gert mitt besta fyrir liðið og ég spila ávallt fótbolta brosandi og frá hjartanu. Ég er yngstur af tíu systkinum úr fátækri fjölskyldu í Santa Domingo í Ekvador. Minn draumur hefur ávallt verið að verða sigursælasti leikmaðurinn í sögu Ekvador.

Ég er afar stoltur af því að geta orðið dýrasti leikmaðurinn í sögu Brighton, en sú upphæð myndi gera félaginu kleift að fjárfesta enn frekar og gera liðið áfram sigursælt.

Stuðningsfólk Brighton hefur gefið mér pláss í hjörtum þeirra, og þau verða alltaf í mínu hjarta, og ég vona því að þau skilji hvers vegna mig langar til að grípa þetta stórkostlega tækifæri," skrifaði Caicedo.

• Blogga um frétt