Ekkert verður úr áformum um keppni í formúlu-1 í dönsku höfuðborginni, Kaupmannahöfn.
Fyrr á árinu lögðu æðstu menn formúlunnar leið sína til borgarinnar við sundin og funduðu með aðilum sem kynnt höfðu áform um að stofna til keppni þar í borg. Lýsti aðalstjórnandi formúlunnar, Chase Carey, bjartsýni á möguleika Kaupmannahafnar til mótshalds.
Aðstoðarborgarstjóranum Ninnu Hedeager Olsen finnst lítið til þessa koma, en hún fer með mál umhverfis- og tæknideilda borgarinnar í borgarstjórninni.
„Framkvæmd móts eins og formúlu-1 er gríðarlega umfangsmikil og kröfurnar miklar að það er algjörlega óraunhæft að keppt verði í Kaupmannahöfn árið 2020,“ segir hún í blaðinu Politiken.
Hún bætir við að vegna undirbúnings keppni og frágangs að henni lokinni hafi verið reiknað út, að mótshaldið hefði í för með sér níu vikna truflun í miðborg Kaupmannahafnar. „Það er vitaskuld algjörlega óaðgengilegt.ׅ“