Emil Hallfreðsson og félagar hans í ítalska liðinu Hellas Verona spila næsta heimaleik án áhorfenda í annarri stúkunni.
Stuðningsmenn Verona hafa verið fundnir sekir um að beita Ganamanninn Sulley Muntari leikmann AC Milan kynþáttarníði í leik liðanna um síðustu helgi. Auk þess að spila næsta heimaleik sinn í deildinni með aðra stúkuna tóma þarf Verona að greiða 50 þúsund evrur í sekt. Sú upphæð nemur tæpum 7,7 milljónum króna.
Næsti heimaleikur Verona í deildinni er á móti Lazio þann 30. þessa mánaðar.