Brasilíska knattspyrnuliðið Chapecoense hefur fengið sigurlaunin afhent fyrir keppnina Copa Sudamericana af Knattspyrnusambandi Suður-Ameríku.
Liðið var á leið í fyrri úrslitaleik keppninnar þegar liðið lenti í flugslysi í Kólumbíu á dögunum með hörmulegum afleiðingum en nítján leikmenn liðsins fórust í slysinu.
Andstæðingur Chapecoense í úrslitaleikjunum átti að vera Atlético Nacional frá Kólumbíu en Kólumbíumennirnir fóru fram á að Brasilíumenn fengju bikarinn og gáfu því úrslitaleikina tvo. Hefur kólumbíska liðið fengið sérstök háttvísisverðlaun frá Knattspyrnusambandi Suður-Ameríku fyrir vikið.
Chapecoense fær 2 milljónir dollara í sinn hlut fyrir sigurinn í keppninni en Atlético Nacional fær 1 milljón dollara.