Aron Elís Þrándarson, leikmaður Aalesund í Noregi, er ekki búinn að ná sér góðum af meiðslum og verður ekki með liðinu á morgun gegn Herd í norsku bikarkeppninni.
Aron Elís meiddist á hásin í síðasta heimaleik gegn Lilleström og var af þeim sökum ekki með í markalausu jafntefli við Rosenborg á sunnudag. Á heimasíðu Aalesund kemur fram að hann sé á góðum batavegi.
Fyrirliðinn Björn Helge Riise verður heldur ekki með liðinu á morgun, en hann meiddist í leiknum við Rosenborg. Þeir Daníel Leó Grétarsson og Adam Örn Arnarson eru hins vegar kattfrískir og spiluðu meðal annars báðir allan leikinn gegn Rosenborg.