KSÍ staðfestir á vef sínum í dag að karlandsliðið mæti Mexíkó í vináttuleik sem fram fer á Levi's leikvanginum í San Francisco, heimavelli ruðningsliðsins San Francisco 49ers, þann 23. mars.
Áður hafði KSÍ staðfest leik gegn Perú sem verður spilaður þann 27. mars á Red Bull Arena leikvanginum í New Jersey.
Ísland og Mexíkó hafa þrisvar mæst áður í vináttulandsleikjum, öll skiptin einmitt í Bandaríkjunum. Fyrst mættust liðin árið 2003 í Phoenix (0:0), næst 2010 í Charlotte (0:0) og loks í Las Vegas í fyrra, þar sem Mexíkó vann 1:0 sigur, fyrir framan mesta áhorfendafjölda sem sótt hefur knattspyrnuleik í Las Vegas.