Julian Nagelsmann, knattspyrnustjóri þýska 1. deildarfélagsins Hoffenheim mun hætta með liðið næsta sumar en þetta staðfesti félagið í dag. Hann mun þá taka við sem knattspyrnustjóri RB Leipzig en þetta staðfesti Leipzig á Twitter síðu sinni núna rétt í þessu.
Nagelsmann er einungis þrítugur að árum en hann er yngsti knattspyrnustjórinn í Evrópu í dag. Hann var sterklega orðaður við stjórastöðuna hjá Arsenal þegar tilkynnt var að Arséne Wenger myndi hætta með liðið í lok tímabils. Þá var hann einnig orðaður við Real Madrid fyrr í sumar en hann hefur stýrt Hoffenheim frá árinu 2015.
Hoffenheim endaði síðasta tímabil í þriðja sæti þýsku 1. deildarinnar, átta stigum á eftir Schalke sem endaði í öðru sæti. Hoffenheim mun spila í Meistaradeild Evrópu á næstu leiktíð en liðið féll úr leik í umspili um laust sæti í Meistaradeildinni á síðustu leiktíð eftir tap gegn enska úrvalsdeildarfélaginu Liverpool.