Markmiðið að vinna Meistaradeildina

Lionel Messi, sóknarmaður spænska knattspyrnuliðsins Barcelona, segir að það sé markmið númer eitt hjá sér, fyrir komandi leiktíð, að vinna Meistaradeild Evrópu. Messi var gerður að fyrirliði spænska liðsins á dögunum eftir að Andrés Iniesta gekk til liðs við Vissel Kobe í Japan.

„Ég vil byrja á því að segja að það er mikill heiður fyrir mig, persónulega, að taka við fyrirliðabandinu hjá þessu magnaða félagi,“ sagði Messi í samtali við spænska fjölmiðla á dögunum. „Ég veit hvað það þýðir að vera fyrirliði hérna og ég hef haft frábæra leiðbeinendur í gegnum tíðina í þeim Puyol, Xavi og Iniesta.“

„Árið í fyrra var gott, við unnum spænsku 1. deildina og bikarkeppnina. Við féllum hins vegar úr leik í Meistaradeildinni í átta liða úrslitum keppninnar og við ætlum okkur að gera betur í ár. Við ætlum okkur að vinna Meistaradeildina í ár,“ sagði Messi en Barcelona vann síðast Meistaradeild Evrópu árið 2015.

• Blogga um frétt