Átta karlmenn voru handteknir vegna óláta sem sköpuðust í Kaupmannahöfn vegna leiks FC Kaupmannahafnar og Malmö í Evrópudeildinni í fótbolta í gærkvöldi. Einn þeirra er á leiðinni í steininn fyrir að kasta reiðhjóli í lögreglumann.
„Hann verður kærður vegna ofbeldis í garð lögreglumanns. Hann kastaði reiðhjóli í lögreglumanninn,“ sagði Søren Lauritsen, yfirmaður rannsóknardeildar hjá lögreglunni í Kaupmannahöfn.
Maðurinn er á þrítugsaldri, danskur og stuðningsmaður FC Kaupmannahafnar. Mikill rígur er á milli félaganna, enda stutt á milli Malmö og Kaupmannahafnar. Hinir sjö stuðningsmennirnir voru látnir lausir að loknum yfirheyrslum. Fimm lögreglumenn slösuðust í ólátunum, en enginn alvarlega.