Hvað voru 20.662 bangsar að gera inni á skautasvellinu í leik Hershey Bears og Syracuse Crunch í AHL-deildinni í íshokkí í Pennsylvaníu á sunnudaginn? Svo sem ekki margt, því þetta voru leikfangabangsar, en ástæðan fyrir veru þeirra á svellinu er einföld.
Í íshokkí í Norður-Ameríku hefur skapast hefð fyrir því að í einum leik á ári taki stuðningsmenn leikfangabangsa með sér í höllina. Þeir kasta svo böngsunum inn á völlinn þegar liðið þeirra skorar sitt fyrsta mark í leiknum. Böngsunum er svo safnað saman og þeir gefnir til góðgerðamála.
Óhætt er að segja að mjúkum böngsum hafi rignt inn á svellið í Hershey, þegar Garrett Mitchell skoraði fyrir heimamenn eftir korters leik. það tók sinn tíma að safna þeim öllum saman og hreinsa svellið, en það var svo tilkynnt á Twitter-síðu Hershey Bears að 20.662 bangsar hefðu safnast.