Björninn vann sinn annan sigur á leiktíðinni í Hertz-deild karla í íshokkíi er liðið mætti SR í Skautahöllinni í Laugardal í kvöld. Í jöfnum leik hafði Björninn betur, 2:1.
Edmunds Induss kom Birninum yfir á 19. mínútu og reyndist það eina mark fyrsta leikhlutans. Brynjar Bergmann tvöfaldaði svo forskotið snemma í öðrum leikhluta.
SR-menn gáfust ekki upp því Petr Kubos minnkaði muninn á 29. mínútu. Það reyndist síðasta mark leiksins, því ekkert var skorað í þriðja og síðasta leikhlutanum.
Með sigrinum fór Björninn upp í 11 stig, en liðið er enn í þriðja og neðsta sæti deildarinnar. SA er á toppnum með 20 stig og SR er í öðru sæti með 17 stig.