Monitor heldur áfram að taka saman hinn fullkomna íslenska lagalista fyrir verslunarmannahelgina, hvort sem er fyrir gítarpartíið eða græjurnar. Í síðustu viku voru það lög níunda áratugarins en nú lítum við á nokkur af útileguvænstu lögum tíunda áratugarins.
1. Higher and Higher - Jet Black Joe.
Þetta lag býður upp á frábært tækifæri til að sýna fram á röddunarhæfileikana.
2. Farin - Skítamórall.
Það er ekkert næntís án Skítamórals sem mun einmitt spila á Þjóðhátíð í ár.
3. Friður - Sóldögg.
Á tíunda áratugnum dró önnur hver hljómsveit nafn sitt af sólinni. Það voru betri tímar.
4. Stanslaust stuð - Páll Óskar.
Árið 1996 spratt Páll Óskar fram eins og skrattinn úr sauðarleggnum með þetta dásamlega lag og allt hefur verið betra síðan þá.
5. Ladyshave - Gus Gus.
Yndislegt lag, stórbrotið myndband.
6. Stick'em Up - Quarashi.
Talandi um hljómsveitir sem koma fram á Þjóðhátíð. Þessi gullmoli hefur svo sannarlega staðist tímans tönn.
7. Þið eruð frábær - Botnleðja.
Má ég snýta ykkur?
8. Það er gott að elska - Bubbi Morthens.
Á níunda áratugnum uppgötvaði Bubbi ástina og tjáði hana fáklæddur en þó með fínan hatt.
9. Draumur um Nínu - Stebbi og Eyfi.
Þjóðin varð aldrei söm eftir að Stebbi og Eyfi sungu um Nínu í Eurovision. Þvílík epík.
10. Terlín - Land og synir.
Rétt upp hönd sem finnst tími kominn á endurkomu hjá Landi og sonum!
11. Lög unga fólksins- Unun.
Ef þú hélst að Nylon hefði átt þetta lag þá skjátlaðist þér hrapallega.
12. Brúðkaupslagið - Todmobile.
Brúðkaupslagið er líklega eitt vinsælasta lag Todmobile en ritstjórn Monitor er ekki ljóst hvort það spili þar inn í að söngvari sveitarinnar er krossfestur í myndbandinu.
13. Partýbær - Ham.
Sódóma Reykjavík er ein yndislegasta arfleifð íslenskrar menningar um tíunda áratuginn en sú mikla gersemi Partýbær fékk einmitt að hljóma í henni.
14. Gott mál - Tweety.
Monitor er ekki frá því að Andrea Gylfadóttir hafi átt fyrrihluta tíunda áratugarins en þetta lag flutti hún sem meðlimur hljómsveitarinnar Tweety.
15. Hjá þér - Sálin hans Jóns míns.
Hjá þér er lagið sem þú spilar á gítarinn þegar þú vilt skapa væmna stemningu þar sem allir fyllast af ást og náungakærleik, nú eða óstjórnlegum biturleika yfir eigin einsemd.