Það er óhætt að segja að nýr kafli sé tekinn við hjá búðareigandanum Catalinu Ncogo því nýverið flutti hún Miss Miss-fataverslun sína í húsnæði á Hverfisgötu en búðin var áður í Holtagörðum. Þá er Catalina einnig nýkomin úr sambandi og nýtur þess að vera á lausu.
Catalina segir búðarreksturinn ganga ágætlega. „Við opnuðum Miss Miss á Hverfisgötu rétt fyrir mánaðamótin júní-júlí og auðvitað tók nokkrar vikur að ná fullum rekstri. En núna eru viðskiptin að aukast,“ útskýrir Catalina.
Vill opna fleiri verslanir
Catalina hefur í nógu að snúast þessa stundina. „Þessa dagana vinn ég mikið að því að koma Miss Miss á kortið. Ég stefni á að koma að minnsta kosti þremur verslunum á laggirnar á helstu sölustöðum höfuðborgarsvæðisins. En þar sem viðræður standa ennþá yfir og þeim samningum er ekki lokið er víst skynsamlegast að ræða það nánar seinna.“
Glamúr einkennir úrvalið í verslun Miss Miss þessa stundina en stíll Catalinu er „blandaður“. „Stíllinn minn er blanda af „street fashion“ og „elegance“. Ég vil að fatasamsetningin sé þannig að ég sé tilbúin í hvað sem er. Til dæmis vil ég geta mætt á skrifstofuna, farið í bankann, skellt mér í göngutúr, slakað á heima og mætt í partí án þess að þurfa að skipta um klæðnað.“
Nýtur þess að vera á lausu
„Ég er nýkomin úr sambandi og nýt þess að vera ein í augnablikinu. Það þýðir hins vegar ekki að ég stefni á að vera áfram á lausu,“ segir Catalina aðspurð hvort hún sé í sambandi.