Hefur gríðarlegan áhuga á plöntum

Bergrún Mist Jóhannesdóttir er 22 ára gömul, fædd og uppalin í Kópavogi en nýlega flutt í 101 Reykjavík. Bergrún Mist stundar nám í lyfjafræði við Háskóla Íslands og er mikill fagurkeri. Við fengum að spyrja hana út í lífið og tilveruna. 

Hver eru þín helstu áhugamál?

„Ég hef mjög gaman af eldamennsku, náttúruferðum og göngum og svo hef ég eiginlega of mikinn áhuga á plöntum.“

Hvað gerir þú til að verðlauna þig?

„Mér dettur voða fátt í hug enda almennt mjög góð við mig hvort sem ég á það sérstaklega skilið eða ekki.“

Hvað er það seinasta sem þú keyptir þér og elskaðir?

„Ég var að enda við að flytja inn í mína fyrstu íbúð og keypti þangað inn sérlega skemmtilega hillueiningu úr IKEA sem ég er voða ánægð með. Svo er ég líka mjög ástfangin af tveimur nýjum plöntum sem fengu að fylgja mér í íbúðina.“

Hlutur sem er þér ómissandi?

„Sængin mín. Hún er tvíbreið og bara svo innilega þægileg, eiginlega of þægileg.“

Uppáhaldsborg?

„Ég kom til Chicago í stutta ferð fyrr í sumar og það er alveg frábær borg, svolítið eins og hreinni og rólegri útgáfa af New York sem er þó líka í miklu uppáhaldi.“

Seinasti veitingastaður sem vakti hrifningu þína?

„Messinn í Lækjargötu, ótrúlega góður matur á mjög sanngjörnu verði.“

Hver er besti minjagripur sem þú hefur tekið með þér heim úr ferðalagi?

„Mér dettur helst í hug krydd og hattur sem komu heim með mér úr dagsferð til Marokkó fyrir nokkrum árum.“

Uppáhaldsskart eða -aukahlutur?

„Nota voða lítið af skarti en mér áskotnaðist nýlega mjög falleg taska sem hún amma mín átti og nota hana mikið.“

Snyrtivara sem þú gætir ekki verið án?

„Ekki beint snyrtivara en rakamaskinn frá Glam Glow er mjög mjög góður og ég kann að meta hann.“

Uppáhalds smáforrit?

„PokemonGO.“

Hvað er á óskalistanum þessa stundina?

„Sófi í nýju íbúðina.“

Uppáhalds smáforrit Bergrúnar er PokemonGO. Ljósmynd/Facebook

• Blogga um frétt