Í toppformi mánuði eftir barnsburð

Líkamlegt ástand þjálfarans, fyrirsætunnar og bloggarans Chontel Duncan var talsvert á milli tannanna á fólki fyrir skemmstu en hún þótti taka heldur til mikið á því í ræktinni. Það eitt og sér hefði líklega ekki í frásögur færandi, nema fyrir þær sakir að Duncan var barnshafandi.

Nú er Duncan aftur farin að vekja athygli, eða öllu heldur líkamlegt ástand hennar en tæpur mánuður er síðan sonur hennar kom í heiminn og ekki að sjá að móðirin hafi alið barn fyrir nokkrum dögum.

Á dögunum deildi Duncan mynd af sér þar sem hún var að koma úr fimm kílómetra gönguferð, en hún segist ætla að snúa aftur í ræktina að hálfum mánuði liðnum. Duncan tók það einnig fram að hún hafði fengið leyfi hjá lækni til að byrja að hreyfa sig, og að hún færi afar varlega.

„Ég er með svo mikla áráttu þegar kemur að líkama mínum, þannig að ég verð að fá leyfi fyrir öllu áður en ég fer og geri það. Ég myndi vera gjörsamlega miður mín ef ég myndi valda sjálfri mér skaða með því að hlusta ekki og vera of fljót á mér. Ef ég finn einhverja örlitla breytingu hringi ég strax í ljósmóðurina mína og spyr hana spjörunum úr.“

Frétt Daily Mail

• Blogga um frétt