Einstaklingskeppni kvenna og karla hófst á heimsleikunum í crossfit í Los Angeles í dag. Keppendur voru ræstir út fyrir sólarupprás í Carson en vissu þó ekki fyrir víst hvaða þrautir bíðu þeirra. Aðstandendur heimsleikanna gáfu út myndband á dögunum þar sem þeir fylgdust með undirbúningi fyrir leikana hjá þeim Annie Mist Þórisdóttur, Katrínu Tönju Davíðsdóttur og Ragnheiður Söru Sigmundsdóttur.
Myndbandið byrjar á því að fylgst er með stelpunum fá sér morgunmat í upphafi dags. Þar kemur fram að Annie Mist hafi borðað nánast sama morgunmatinn á hverjum morgni í eitt ár, steikt egg, beikon og hafragraut með hnetusmjöri. Hún stefnir á að koma tvíefld til baka á heimsleikunum í ár þar sem hún þurfti að draga sig úr keppni í fyrra vegna hitaslags. „Ég ætla að passa upp á að þetta gerist ekki aftur, fólk á ekki að muna þannig eftir mér.“
„Áður en ég byrjaði í crossfit var ég feitur krakki. Ég er í rauninni enn feit að innan, ég elska mat,“ sagði Ragnheiður Sara Sigmundsdóttir áður en hún píndi ofan í sig glas af rauðrófusafa í morgunsárið sem er greinilega ekki í uppáhaldi hjá henni. Það fyrsta sem hún ætlar að gera eftir leikana er að fara út í ísbúð og fá sér bragðaref með nóg af kökudeigi.
Í myndbandinu segist Ragnheiður Sara hafa prófað margar íþróttir í æsku en einhvern veginn gefist upp á þeim öllum. „Ég vil vinna heimsleikana til þess að sýna ungum stelpum sem finna sig ekki í öðrum íþróttum að allt er hægt ef viljinn er fyrir hendi.“
Þá var ferðinni heitið til Boston þar sem að Katrín Tanja Davíðsdóttir, sem sigraði heimsleikana í fyrra, býr nú. Hún segist í raun hafa orðið ástfangin af ferlinu í kringum leikana og síðan hafi verið extra bónus að vinna þá i fyrra. Hún starfar mikið með íþróttarisanum Reebok og er núna að vinna að því að búa til sína eigin crossfit-skó. „Ég er í betra formi nú en nokkru sinni áður og sterkari en nokkru sinni áður. Það sem ég er núna er nóg til þess að vinna heimsleikana.“