Að þurfa að létta á sér fjarri heimahögum getur valdið fólki ansi mikilli togstreitu, þá sér í lagi þegar fólk þarf að gera númer tvö. Kvíðinn getur orðið svo mikill að ríflega helmingur fólks getur hvergi hugsað sér að kúka nema á heimili sínu.
Ný rannsókn, sem framkvæmd var í Bretlandi og Bandaríkjunum, leiddi í ljós að rúmlega helmingi þátttakenda fannst hræðileg tilhugsun að hafa hægðir á almenningssalerni, en konur voru þar í meirihluta.
Rannsóknin leiddi einnig í ljós að hræðilegustu staðirnir til að hafa hægðir á væru vinnustaðurinn, heimili vinafólks og almenningssalerni þar sem aðeins er einn bás. Þá þykja veitingastaðir og barir heldur ekki ákjósanlegir staðir til að ganga örna sinna.
Rannsóknin var síður en svo hávísindaleg, en 59 Bandaríkjamenn svöruðu spurningum og 103 Bretar, líkt og lesa má í frétt Women's Health.