Svona heldur Meghan Markle sér í formi

Frægðarsól Meghan Markle hefur risið hratt undanfarið, sér í lagi eftir að út spurðist að hún ætti í ástarsambandi við Harry Bretaprins.

Markle hugsar vel um sig enda þykir henni mikilvægt að vera í góðu formi, bæði líkamlega sem andlega.

„Heilsa mín, hugarástand, tilfinningin sem maður fær eftir að maður hreyfir sig, allir þessir hlutir hvetja mig til þess að stíga á jógamottuna, eða fara í ræktina. Stundum er tilhugsunin að fara í ræktina algerlega hræðileg, en ég minni mig á hversu vel mér mun líða eftir æfinguna. Alsæl næstum,“ sagði Markle í viðtali við Women‘s Health.

Móðir Markle var jógakennari og kann hún því sérlega að meta jóga. Þá segir leikkonan að hennar hugleiðsla felist í því að fara út að hlaupa.

„Hlaup hefur alltaf verið mín hreyfihugleiðsla. Ég hef miklar mætur á því að hlaupa, enda fæ ég þá hvíld frá huganum á meðan.“

Markle segir að það sé líka nauðsynlegt að slappa af og njóta sín, enda sé galið að strita sér út í tíma og ótíma.

„Ég leyfi mér að eiga gæðastund með sjálfri mér. Við erum öll svo ótrúlega upptekin og með svo marga bolta á lofti. Ég tek því alltaf klukkutíma í að slaka á, horfa á heilalaust sjónvarpsefni, knúsa hundana mína. Það er partur af prógramminu. Þetta snýst um jafnvægi.“

Markle veit að það er mikilvægt að slaka á. Skjáskot / Instagram

• Blogga um frétt