Fólk ætti að hugsa sig tvisvar um áður en það ákveður að sleppa því að pakka íþróttafötunum ofan í tösku þegar það skreppur í sólina í sumar en samkvæmt rannsókn frá University of Liverpool byrja vöðvarnir að rýrna verulega eftir tveggja vikna pásu frá æfingum.
Samkvæmt Indy100 minnkar vöðvamassinn ekki svo mikið ef æfingum er sleppt í tvær vikur en um leið og þú æfir ekkert í yfir tvær vikur geta hlutirnir breyst. Ekki nóg með að vöðvarnir rýrni heldur aukast líkurnar á hjartasjúkdómum og sykursýki líka.
28 einstaklingar tóku þátt í rannsókninni og var meðalaldur þeirra 25 ár. Þátttakendurnir voru ekki í gríðarlega góðu formi en hraustir og hreyfðu sig ágætlega mikið. Þeir héldu sama mataræði en minnkuðu hreyfinguna meðan á rannsókninni stóð. Í ljós kom að þeir fitnuðu.
Þrátt fyrir að fólk taki sér frí frá æfingum meðan á sumarfríi stendur getur það á stuttum tíma komið sér í sama form og áður en því lengur sem fólk sleppir hreyfingu því erfiðara er að komast aftur í form.