María Rut Kristinsdóttir, markaðsstjóri GOmobile, og Ingileif Friðriksdóttir, lögfræðinemi og blaðamaður á mbl.is, búa ásamt syni sínum Þorgeiri Atla í bjartri og fallegri íbúð við Starhaga í Reykjavík. Sigurborg Selma heimsótti þær fyrir Sunnudagsblað Morgunblaðsins.
„Okkur finnst mikilvægt að innrétta heimilið þannig að okkur líði vel þar. Það er svo ótrúlega mikilvægt að líða vel heima hjá sér, og með því að gera heimilislegt og setja myndir á veggina býr maður til þannig andrúmsloft,“ segja þær María og Ingileif sem festu kaup á íbúðinni í byrjun árs. „Eftir að við eignuðumst okkar íbúð höfum við gert okkar besta til að gera hana hlýlega, sem gerir það að verkum að við viljum nánast ekki fara út því okkur líður svo vel heima.“
Parið segist heillast af skandinavískum stíl og einfaldleika á heimilið. „Hvítur litur er mjög áberandi á heimilinu okkar, í bland við svartan – en svo finnst okkur mjög gaman að lífga upp á heimilið með skrautlegu smádóti eða fallegum myndum,“ útskýrir Ingileif og bætir við að þrátt fyrir einfaldleika vilji þær samt sem áður hafa hlutina persónulega og heimilislega.
María Rut og Ingileif sækja innblástur á Pinterest og Instagram og settu þær upp sameiginlega Pinterest síðu þegar þær biðu eftir að fá íbúðina afhenta. „Til að byrja með var Ingileif aðallega að missa sig þar. Svo kviknaði áhuginn hjá mér líka og nú leitum við báðar mikið innblásturs þangað. Svo er Ingileif að elta nokkra flotta heimilisbloggara á Instagram og þaðan koma líka stundum upp góðar hugmyndir,“ segir María.
Aðspurðar hver sé griðastaður fjölskyldunnar inni á heimilinu nefna þær stofuna þar sem fjölskyldan borðar saman og á notalegar stundir. „Á föstudögum erum við alltaf með kósýkvöld og finnst okkur þá fátt betra en að liggja öll saman í sófanum og hjúfra okkur yfir góðri mynd,“ segir Ingileif.