Húsnæðismál hafa verið mikið í umræðunni upp á síðkastið og þá sér í lagi skortur á ódýru íbúðarhúsnæði fyrir þá sem eru að stíga sín fyrstu skref á húsnæðismarkaðnum.

Þegar fasteignavefur mbl er skoðaður er ljóst að úrvalið af litlum og ódýrum eignum er ekki upp á marga fiska, en slegist er um álitlegar eignir og eru þær fljótar að rjúka út.

Smartland fór á stúfana og kíkti á fasteignavefinn í leit að ódýrum eignum á höfuðborgarsvæðinu. Íbúðir sem kosta undir 25 milljónum eru fremur fáar, en nokkrar seldust hreinlega á meðan greinin var í vinnslu.

Ýmsar leiðir eru færar í íbúðarkaupum, en til að geta tekið hefðbundið íbúðalán þarf yfirleitt að eiga 15% af kaupverði eignarinnar í útborgun. Það þýðir að ef kaupa á eign á 20 milljónir þurfa kaupendur að eiga þrjár milljónir. Það þarf þó að hafa í huga að ef íbúð er ósamþykkt þá gilda ekki sömu lánareglur. Íbúðalánasjóður lánar til dæmis ekki fyrir ósamþykktum íbúðum og í þeim tilfellum þarf fólk að fá lán á öðrum stöðum. 

Hér að neðan fer listi yfir nokkrar ódýrar eignir, þar sem uppsett verð er undir 25 milljónum.

15-20 milljónir (2,25 – 3 milljónir í útborgun)

Ein ódýrasta eignin á ská er staðsett við Sólvallagötu, en um ósamþykkta stúdíóíbúð er að ræða. Eignin er 30 m² og sett á 15,5 milljónir. Íbúðarrýmið sjálft er 18,6 m² en geymsla í kjallara fylgir.

Íbúðin er ósamþykkt og skráð sem verslun. Ljósmynd / Fasteignavefur mbl

Við Öldugötuna má einnig finna ósamþykkta stúdíóíbúð. Íbúðarrýmið er á jarðhæð, og skiptist í þrjú hólf, alrými, baðherbergi og eldhús. Kaupverð er 16,9 milljónir.

Svefnrýmið í stúdíóíbúðinni á Öldugötu. Íbúðin er sett á 16,9 milljónir. Ljósmynd / Fasteignavefur mbl

Við Njálsgötu í Reykjavík stendur 40 m² stúdíóíbúð, en hún er föl fyrir 19,9 milljónir. Íbúðin hefur að geyma alrými, eldhús og baðherbergi, en lofthæð er minni en gengur og gerist.

Lofthæðin er lægri en gengur og gerist í stúdíóíbúðinni á Njálsgötu. Ljósmynd / Fasteignavefur mbl

20-25 milljónir (3 – 3,75 milljónir í útborgun)

Við Kirkjustétt í Grafarholti er að finna 53 m² vinnustofu sem hefur verið innréttuð sem tveggja herbergja íbúð. Ásett verð er 22,9 milljónir.

Íbúðin var upphaflega vinnustofa. Ljósmynd / Fasteignavefur mbl

Við Barónsstíg í Reykjavík er að finna tveggja herbergja ósamþykkta kjallaraíbúð, sem föl er fyrir 23,4 milljónir.

Við Barónsstíg er að finna tveggja herbergja ósamþykkta íbúð og er kaupverðið 23,4 milljónir.

Við Njarðargötu er að finna nýlega uppgerða, tveggja herbergja íbúð. Íbúðin er 45 m² og er ásett verð 23,9 milljónir.

Við Njarðargötu er að finna litla tveggja herbergja íbúð á 23,9 milljónir. Ljósmynd / Fasteignavefur mbl

Tengdar fréttir

Heimili

Jón Jónsson og Hafdís selja 182 milljóna einbýli

• Rakel og Pálmi Guðmunds selja lekkera íbúð á besta stað
• Stílhreint 105 fm einbýli í Kópavogi
• Arkitektahöll í Fossvogi með eftirsóknarverðum eiginleikum
• 5 sjarmerandi eignir sem kosta undir 55 milljónir

» Fleiri tengdar fréttir

• Blogga um frétt