Regnbogaparadís í Los Angeles

Amina Mucciolo er ekki bara sjálf með litríkt hár og lifir litríku lífi heldur hefur hún breytt íbúð sinni í Los Angeles í litaparadís. Ef einhver er orðinn leiður á svarthvítri skandinavískri innanhússhönnun er heimili Mucciolo góður innblástur. 

Samkvæmt Independent vildi Mucciolo búa í íbúð sem minnti einna helst á lifandi innsetningu. Íbúðin á líka að minna á vorið sem er uppáhaldsárstíð Mucciolo. „Það er eitthvað við vorin, frídagarnir, litirnir, þessi ferska hamingjutilfinning. Það er svo hvetjandi fyrir mig,“ sagði Mucciolo. 

En Mucciolo hannaði íbúðina sjálf með eiginmanni sínum Salvatore. Saman standa þau að hönnunarfyrirtækinu Studio Mucci.