Hönnunarfyrirtækið Minarc, sem er í eigu Íslendinganna Erlu Daggar Ingjaldsdóttur og Tryggva Þorsteinssonar, hannaði þetta dásamlega einingahús í Culver City í Kaliforníu. Umfjöllun um húsið birtist í Dwell magazine.
Hjónin Erla og Tryggvi, sem hafa verið búsett í Los Angeles í yfir 20 ár, sérhæfa sig í hönnun á vistvænum einingahúsum.
Erla og Tryggvi þróuðu vistvæna byggingartækni til þess að byggja einingahúsin sem ber heitið mnmMOD. Tæknin virkar þannig að húsin koma í flatri pakkningu sem er svo létt að hvorki þarf vinnuvélar né krana til að koma þeim saman heldur eru þau flutt á vörubílum og síðan skrúfuð saman. Einingarnar eru aðeins unnar úr endurunnum og vistvænum efnum.
Hjónin hafa hlotið mörg hönnunarverðlaun fyrir verk sín en þau hönnuðu Ion-hótelið á Nesjavöllum og ION City sem var opnað á Laugaveginum um miðjan maí. Þau hanna ekki bara heilu húseignirnar heldur líka húsgögn, ljós og annað sem prýða má heimilið.