Byggði sitt eigið hús út frá Pinterest

Óskarsverðlaunaleikkonan Diane Keaton er mikil áhugakona um hönnun og byggði hún sér nýverið hús frá grunni. Keaton er að gefa út bókina „The House that Pinterest Built“ sem fjallar meðal annars um hvernig hún notaði Pinterest við hönnun hússins. 

Í bókarlýsingunni segir að þegar Keaton ákvað að byggja sitt eigið hús frá grunni fékk hún það ráð frá vinkonu sinni, leikstjóranum Nancy Meyers, að nota Pinterest til þess að fá innblástur. Á síðunni fann hún bæði nytsamlegar lausnir og flottan stíl. 

Nýja húsið er múrsteinshús og lýsir hún því sem blöndu af hlöðu og verksmiðju. Baðherbergið minnir til að mynda á gamla verksmiðju og er mikið um grófa og stóra muni í húsinu eins og til dæmis ljósin. Keaton virðist hafa unnið heimavinnuna á Pinterest vel því húsið er afar smekklega hannað.