Magnús Geir Þórðarson og Ingibjörg Ösp Stefánsdóttir létu sig ekki vanta á frumsýningu leikritsins Maður sem heitir Ove. Hjónin giftu sig á dögunum við hátíðlega athöfn í Dómkirkjunni.  

Sigurður Sigurjónsson eða Siggi Sigurjóns eins og hann er kallaður átti stjörnuleik í verkinu sem er ættað frá Svíþjóð. Þar leikur hann mjög geðstirt gamalmenni eða kannski ekki alveg gamalmenni því Ove er ekki nema 59 ára en hagar sér svolítið eins og hann sé alveg að fara að deyja. 

Líf hans tekur þó óvænta stefnu og áður en hann veit af er hann búinn að gefa svo miklu meira af sér en hann ætlaði og orðinn svo miklu hressari en hann á kyn til. Það eru þó ákveðnir hlutir sem Ove getur ekki sætt sig við.