Margar konur kannast við að eyða óratíma fyrir framan spegilinn áður en þær fara út á lífið. Þær kaupa föt fyrir fúlgur fjár og mála sig og greiða listilega áður en haldið er út á djammið. En þetta gera þær ekki til að heilla karlpeninginn heldur til að ganga í augun á öðrum konum.
Nýleg könnun leiddi í ljós að um helmingur þeirra kvenna sem tóku þátt í henni er tilbúinn til að verja óratíma í að snurfusa sig í von um að heilla vinkonur sínar og aðrar konur. Ein af hverjum tuttugu konum sem tóku þátt í könnuninni sagði álit bestu vinkonu sinnar skipta sig mun meira máli en álit hins kynsins þegar kemur að hári og förðun. Frá þessu er greint á heimasíðu DailyMail.
Nærri tveir þriðju kvennanna sögðu þá hrós frá vinkonu gleðja sig meira en hrós frá ókunnugum manni en niðurstöðurnar leiddu þó í ljós að flestar kvennanna fundu fyrir sannri ánægju þegar ókunnugur hrósaði útliti þeirra.
Niðurstöðurnar leiddu einnig í ljós að venjuleg kona eyðir að jafnaði rúmum tveimur klukkustundum fyrir framan spegilinn áður en hún fer út á lífið.
Áhugaverðast þótti þá að ein af hverjum tíu konum sem tóku þátt í könnuninni viðurkenndi að sannkölluð samkeppni ríkti innan vinkonuhópsins um útlit. Þær konur gengu jafnvel svo langt að forðast alfarið að hrósa vinkonum sínum ef þær litu vel út.