Hefur þig alltaf langað til að vita hverjir hafa eytt þér af samfélagsmiðlum á borð við Facebook og Instagram? Núna er það hægt með hjálp forritsins Who Deleted Me.
Who Deleted Me er viðbót sem hægt er að bæta við Google Chrome-vafrann. Forritið sendir þér tilkynningu um leið og einhver eyðir þér af samfélagsmiðlum. Forritið var gefið út í seinustu viku og hefur vakið mikla athygli.
Það er einn hængur á. Who Deleted Me segir bara til um hver hefur eytt þér af samfélagsmiðlum síðan þú sóttir forritið. Þess vegna er ekki hægt, enn sem komið er, að komast að því hver hefur eytt manni áður en forritið kom til sögunnar.
Á heimasíðu forritsins má finna allar helstu upplýsingar um hvernig það virkar. Heimasíðan hefur þó legið niðri annað slagið vegna álags. Það vilja greinilega allir vita hverjir hafa eytt þeim.