„Ég og maki minn höfum verið saman í sex ár. Þegar ég var 31 árs fékk ég krabbamein í eggjastokkana, sem endaði með því að ég fór í legnám. Núna er ég 34 ára. Áður en ég veiktist höfðum við rætt að stofna fjölskyldu, en hann vildi aldrei skuldbinda sig. Eftir að ég gekkst undir aðgerðina höfum við varla upplifað neina kynferðislega nánd,“ segir í bréfi konu sem leitaði á náðir Pamelu Stephenon-Connolly, sérlegs kynlífs- og sambandsráðgjafa dagblaðsins Guardian.
„Á tímabili var ég ákaflega gröm út í hann, og núna líður mér stundum eins og ég sé ekki kona. Ætti ég að gefast upp og róa á önnur mið?“
Stephenson-Connolly er ekki ráðgjafi fyrir ekki neitt, enda átti hún ekki í neinum vandræðum með að hjálpa hinni vansælu konu.
„Þegar fólk hefur barist við veikindi á það oft í erfiðleikum með að leyfa sér að njóta þess sem það gerði áður. Þú hefur upplifað svo mikil særindi, en þú virðist tengja kynlíf við veikindi þín og depurðina yfir því að geta ekki gengið með barn. Þú getur þó notið kynlífsins með maka þínum á ný ef þið einblínið á afslappað kynlíf. Finnið ykkur tíma, slökkvið á símanum, ýtið vandamálunum til hliðar og leyfið ykkur að týnast í hinu líkamlega. Þú munt syrgja það að geta ekki gengið með barn í nokkurn tíma, og það gæti gagnast þér að leita þér utanaðkomandi aðstoðar.“