Sigurður Bogi Sævarsson sbs@mbl.is

Allt ber að þessu sinni upp á sama daginn hjá sjónvarpskonunni Þóru Arnórsdóttur sem verður 37 ára í dag.  Verðlaunahátíð Eddunnar – íslensku kvikmynda- og sjónvarpsverðlaunanna er einmitt í kvöld og er Kastljósið þar nú tilnefnt til verðlauna í fyrsta sinn. Af því tilefni hyggjast Kastlýsingar gera sér glaðan dag, enda ærið tilefni til. Ætlar fólk að fara saman út að borða og með mökum telur þessi góði hópur um tuttugu manns.

„Ég er ólétt og á von á mér í byrjun maí. Eftir því sem barnið hefur stækkað hefur úthaldið minnkað og ég reikna því ekki með að dansa uppi á borðum á Eddunni langt fram eftir nóttu. Við hjónakornin eigum gjafabréf á hóteli og hyggjumst nýta okkur það um helgina; fara í skemmtilega borgarferð til Reykjavíkur. Og ég hlakka virkilega til. Það verður sem sagt ekki gert neitt stórkostlegt beint í tilefni af afmælinu. Ég geymi mér það í þrjú ár enn; fram að fertugu,“ segir Þóra.