María Birta og Elli gengu í hjónaband

Leikkonan og verslunareigandinn María Birta Bjarnadóttir og listamaðurinn Elli Egilsson gengu í hjónaband hinn 14. júlí er fram kemur í DV í dag.

Brúðkaupið fór fram í Grímsnesinu undir berum himni og voru aðeins þeirra allra nánustu viðstaddir. María Birta hefur verið áberandi í samkvæmislífinu en hún stimplaði sig rækilega inn þegar hún lék eitt af aðalhlutverkunum í kvikmyndinni Svartur á leik sem byggð var á samnefndri bók Stefáns Mána.

Leiðir hjónanna lágu saman á samskiptamiðlinum Instagram í október og byrjuðu þau saman í kjölfarið. Sambandið þróaðist hratt og í febrúar festi María Birta kaup á brúðarkjólnum en hann var keyptur í Kaliforníu þar sem hjónin dvöldu um tíma í vetur.

Framundan eru spennandi tímar. María Birta hyggst reyna fyrir sér í leiklistinni og er komin með umboðsmann í Los Angeles. Þau verða þó ekki alein í heiminum þegar þau flytja út því bróðir Ella, Einar Egilsson, er búsettur í borginni ásamt eiginkonu sinni, Svölu Björgvinsdóttur, sem saman skipa hljómsveitina Steed Lord.

Smartland Mörtu Maríu óskar þeim hjartanlega til hamingju með ráðahaginn.

• Blogga um frétt