„Hann Bingó minn er 8 ára gamall Berner Sennen hundur en það eru svissneskir fjallahundar, svolítið skyldir St. Bernhards,“ segir Lilja Pálmadóttir þegar ég hafði samband við hana eftir að hafa séð hana með stóran og glæsilegan hund í bandi í miðbæ Reykjavíkur.
Lilja segir að Berner Sennen hundar séu algjörir öðlingar, góðir við alla og frábærir fjölskylduhundar.
„Ég fór til Tromsö að ná í hann þegar hann var bara 5 mánaða en þá var hann þegar orðinn eins stór og meðal Labrador. Það er ekkert nema gleði og ánægja að hafa hann á heimilinu.“
Aðspurð hvort hún sé mikil hundakona segir hún svo vera.
„Ég hef mjög gaman að hundum en Bingó er fyrsti hundurinn minn.“
Lilja með hundinn Bingó.
Ljósmynd/Baldur Kristjánsson