Davíð Lúther Sigurðsson, kvæntur tveggja barna faðir, ákvað að fara óhefðbundna leið við að selja bílinn sinn. Um er að ræða svartan KIA Carens, 7 manna, árgerð 2007 sem er keyrður 127.000 km. Í stað þess að setja bílinn á bílasölu fékk hann rapparann Móra til að búa til lag um bílinn enda ákaflega gott farartæki þarna á ferð. Davíð er eigandi The Color Run á Íslandi og framleiðslufyrirtækisins SILENT.
„Það eru tugir þúsunda bíla á skrá hjá bílasölum landsins og vildi ég skera mig úr og fá meiri athygli á minn bíl,“ segir Davíð þegar hann er spurður að því hvers vegna hann hafi farið þessa leið til að selja sinn 7 manna bíl.
„Ég þekkti Móra ekkert fyrir verkefnið, en auðvitað kynntist ég honum þegar verkefnið var sett í gang. Mikill meistari. Hugmyndin kviknaði á fundi í framleiðslufyrirtækinu SILENT sem ég á og er það einmitt verkefni SILENT að gera auglýsingar og höfum við undanfarin ár farið óhefðbundar leiðir í auglýsingagerð. Það er ekki dýrt að versla við SILENT, sérstaklega þegar ég fékk góðan starfsmannaafslátt,“ segir hann og bætir við að Móri hafi verið meira en til í þetta verkefni.
„Þegar við höfðum samband við Móra um að fara í þetta var hann alveg til, enda skemmtilegt verkefni. Ég vona auðvitað að bíllinn seljist en ef ekki þá fer ég bara með hann á næstu bílasölu og reyni á þá leið,“ segir Davíð.
Er myndbandið að skila árangri?