Rapparinn Terrance LeVarre Thornton, sem betur er þekktur undir listamannanafni sínu Pusha T, giftist kærustu sinni til 11 ára, Virgina Williams, á dögunum. Brúðkaupið var einstaklega fallegt en Vogue fjallaði um brúðkaupið. Gestirnir voru ekki af verri endanum en Pharrel Williams var svaramaður Pusha T og voru Kanye West og Kim Kardashian viðstödd. Pusha T er forseti útgáfufyrirtækis Kanye West, GOOD Music.
Brúðguminn klæddist jakka frá Dior og buxum frá hönnuðinum Kim Jones. Brúðurin klæddist kjól frá Marchesa með löngu v-hálsmáli við athöfnina. Í veislunni klæddist hún svo gullfallegum kjól frá Reem Acra. Í veislunni fengu allir brúðkaupsgestirnir inniskó frá Adidas til að skipta yfir í ef þeir skyldu færa sig yfir á dansgólfið.