Smartland Mörtu Maríu | Tíska | mbl | 29.1.2014 | 0:00

Eru hælaskór að detta úr tísku?

Leikkonan Emma Thompson fékk nóg af því að vera í háum hælum á Golden Globe - verðlaunahátíðinni og fór úr þeim áður en hún gekk á sviðið. mbl.is/AFP

Það var einu sinni þannig að það sem setti punktinn yfir i –ið þegar samkvæmisklæðnaðurinn var valinn voru hælarnir.

Meira að segja þótti það eilítið púkalegt að vera í lágbotna skóm við glæsilegan kvöldfatnað.

Svo virðist hins vegar sem að hælaskórnir séu á leiðinni í pásu, samkvæmt helstu tískuspekúlöntum.

Samkvæmt heimildum Daily Mail eru tískuskvísurnar Alexa Chung, Peaches Geldof og Kate Moss þær sem eiga hrós skilið fyrir að gera lágbotna skóna töff á ný, með því að klæðast þeim á rauða dreglinum, síðustu mánuði.

Einnig hafa fyrirsætur á tískupöllunum gengið um pallanna í lágbotna skóm, jafnvel íþróttaskóm.

Samkvæmt nýrri könnun kjósa konur að vera frekar í þægilegum skóm í stað þess að kveljast í hælaskóm.

Fyrr í þessum mánuði á Golden Globe - verðlaunahátíðinni, gekk leikkonan Emma Thompson á tásunum á sviðið og sagði: „Ég er komin úr hælunum og sendi frá mér femíníska yfirlýsingu í raun, af því að ég meina af hverju erum við í þessu? Það er svo sársaukafullt og tilgangslaust í raun.“

Thompson er ekki ein um þessa skoðun en meira en 75 prósent kvenna kjósa að vera í þægilegum skóm þegar kemur að skóbúnaði.

„Konur undir 35 ára eru tilbúnar að fórna sér fyrir tískuna,“ sagði Tamara Sender hjá Mintel fashion og bætti við: „Konur sem eru hins vegar 55 ára og eldri vilja frekar ganga í skóm sem eru þægilegir og passa.“

Mögulega eru karlmennirnir að fara taka við, en eins og fram kom á mbl.is fyrir skömmu þá sáust karlfyrirsætur ganga í hælaskóm á tískupöllum í Lundúnum.