Núna gleðst margt tískuáhugafólk þar sem H&M er á leið til landsins. En þetta er ekki í fyrsta sinn sem landsmenn gleðjast yfir komu H&M til Íslands því árið 1991 var sama uppi á teningnum, fréttir af komu H&M glöddu marga.
„Íslendingar munu hins vegar bráðlega eignast sína eigin Hennes & Mauritz búð í Kringlunni. Þar opnar um miðjan þennan mánuð verslun sem mun hafa á boðstólnum fatnað frá þessu þekkta fyrirtæki ásamt öðrum ódýrum fatnaði,“ sagði í viðskiptafrétt Morgunblaðsins þann 5. september árið 1991.
Þess má geta að fötin frá H&M voru þá seld í verslun sem bar heitið 51. stræti og var í eigu Garðars Kjartanssonar. Sú verslun var í Kringlunni. „Þeir hafa ekki talið svara kostnaði að setja upp eigin verslun hér þar sem þeir eru yfirleitt ekki í minna húsnæði en 1.000 fm. Húsnæðið sem 51. stræti verður í er hins vegar um 140 fm,“ sagði Garðar í viðtalinu.
Svo eru eflaust margir sem muna eftir H&M-versluninni sem var í Kringlunni 7 (í Húsi verslunarinnar) á sínum tíma. Þannig að með tilkomu H&M í Kringluna á næsta ári verður það ekki í fyrsta sinn sem landsmenn hafa greiðan aðgang að H&M.