Það kannast eflaust margir við að stilla sér upp á sama máta þegar ljósmyndara ber að garði, öll viljum við jú sýna okkar bestu hliðar.
Andlit okkar eru langt frá því að vera samhverf og hugsanlega er önnur hlið þess okkur frekar að skapi en hin.
Ljósmyndarinn Alex John Beck rannsakar samhverfu í nýrri ljósmyndaseríu sinni sem hann kallar Both Sides of. Beck tók portrett myndir af fólki sem hann vann síðan í tölvu. Hann skipti andlitum fólks í helminga með tölvutækni og speglaði svo vinstri hliðina annars vegar, og hægri hins vegar.
Á endanum sat hann eftir með tvær myndir sem sýna hvernig fyrirsætur hans myndu líta út ef andlit þeirra væru algerlega samhverf.
Það er forvitnilegt að sjá að hjá sumum viðföngum hans er ansi mikið til í þessu með góðu og slæmu hliðina.
Fleiri myndir má sjá á Lost at E Minor.