Kardashian og Jenner systurnar eru meðal þekktustu kvenna í heiminum í dag. Þær má reglulega sjá í fjölmiðlum, þær tröllríða samfélagsmiðlum, auk þess sem þær halda úti vinsælum raunveruleikaþætti. Þess að auki hanna þær föt, gefa út bækur og sitja fyrir á tískuljósmyndum svo eitthvað sé nefnt.
Vinsældir þeirra er gríðarlegar, en nú hefur komið í ljós að eftirspurnin eftir fegrunaraðgerðum hefur aukist í takt við vinsældirnar, en margir eiga sér þann draum heitastan að líkjast systrunum.
Mark Norfolk, starfandi lýtalæknir í Bretlandi, segir að margar breskar konur ákveði að leggjast undir hnífinn í tilraun til að líkjast raunveruleikastjörnunum. Jafnframt bendir hann á að aukning í fyrirspurnum sé gríðarleg, til að mynda hafi eftirspurnin eftir varafyllingarefni rokið upp um 700% eftir að Kylie Jenner játaði að hafa gengist undir slíka aðgerð fyrr á árinu.
„Kardashian systur, og þeirra líkar, hafa haft gríðarleg áhrif á fólk með klæðaburði sínum og útliti. Systurnar hafa sankað að sér fjölda aðdáenda sem við sjáum við störf okkar. Til að mynda hefur orðið 54% aukning í fyrirspurnum um rassígræðslur sem eru innblásnar af Kim og Khloé.“
„Enginn hefði getað sagt til um áhrifin sem Kylie myndi hafa á varafyllingarbransann. Hún er án efa helsti talsmaður þessarar aðgerðar.“