Bakvörðurinn reyndi Matt Garner gæti orðið leikfær í sumar en hann er að jafna sig eftir slæmt fótbrot gegn Keflavík í september.
Jóhannes Harðarson þjálfari ÍBV segist í samtali við netmiðilinn Fótbolta.net vera vongóður um að Garner nái sér að fullu og geti spilað með liðinu í sumar. Ekki sé þó miðað við sérstaka dagsetningu í þeim efnum en Jóhannes nefnir að verði Garner leikfær áður en Íslandsmótið er hálfnað þá líti hann á það sem bónus.
Að öðru leyti gera Eyjamenn ráð fyrir því að allir leikmenn þeirra verði heilir þegar boltinn rúllar af stað í Pepsí-deildinni.