„Erum betur í stakk búnar í ár“

Gunnar Rafn Borgþórsson, þjálfari Selfoss, segir að mikil stemming sé í bæjarfélaginu fyrir bikarúrslitaleik liðsins gegn Stjörnunni. Bikarúrslitaleikurinn í knattspyrnu kvenna fer fram á Laugardalsvellinum klukkan 16.00 í dag og Ólafur Þór mikinn hug vera í herbúðum Stjörnunnar.

 „Það er gríðarlega mikil stemming bæði í liðinu og í bæjarfélaginu öllu. Það verður blásið til bæjarhátíðar í dag annað árið í röð. Það verður eitthvað svaka húllúmhæ og fríar rútuferðir á Laugardalsvöllinn. Það er stefnan að fjölmenna á leikinn,“ sagði Gunnar Rafn Borgþórsson, þjálfari Selfoss í samtali við mbl.is.

„Leikir Selfoss og Stjörnunnar hafa ávallt verið hörkuleikir. Þetta eru tvö líkamlega sterk lið og hröð. Þetta hafa verið gríðarlega jafnir leikir undanfarin ár. Í ár höfum við unnið þær tvisvar og þær unnið okkur tvisvar. Ég býst við að þetta verið hágæða fótboltaleikur í dag,“ sagði Gunnar Rafn enn fremur.

„Við erum klárlega betur í stakk búnar til þess að vinna bikarúrslitaleikinn í ár en í fyrra. Ég hef fundið það alla vikuna að spennustigið hjá leikmönnum liðsins er betur stillt í ár en í fyrra til að mynda. Við erum yfirvegaðri í allri umræðu og nálgun okkar í leik. Flestir leikmenn liðsins voru að spila sinn fyrsta bikarúrslitaleik í fyrra. Nú erum við reynslunni ríkari og vitum betur hvað við erum að fara út í. Að þessu sinni er meiri tilhlökkun í hópnum frekar en spenna,“ sagði Gunnar Rafn.

„Ég held að leikurinn í dag ráðist á því hvort liðið geri færri einstaklingsmistök. Liðin munu hvorugt gefa mikil færi á sér. Bæði lið eru hröð og geta útfært skyndisóknir sínar vel. Þegar annað liðið gerir mistök mun hitt liðið freista þess að refsa fyrir þau,“ sagði Gunnar Rafn að lokum.  

• Blogga um frétt