Spænski framherjinn Sito greinir frá því í samtali við spænska netmiðilinn adiantegalicia.es að hann muni leika með Fylkismönnum á næstu leiktíð.
Sito gekk í raðir ÍBV um mitt tímabil og skoraði sex mörk í 11 leikjum liðsins í Pepsí-deildinni í sumar og átti stóran þátt í að Eyjamenn náðu að halda sæti sínu í deildinni.
„Ég kem til með skipta um félag og ég hlakka til að takast á við nýja áskorun,“ segir Sito í viðtali við spænska netmiðilinn.
Eyjamenn eru ekki sáttir við vinnubrögð Fylkismanna en þeir saka Árbæjarliðið um að hafa samið með ólögmættum hætti við Spánverjann.