Alfreð Finnbogason lék sinn fyrsta leik í þýsku 1. deildinni í knattspyrnu í dag eftir að hann gekk til liðs við Augsburg í vikunni. Hann kom inn á sem varamaður þegar 20 mínútur voru eftir af leik Augsburg og Ingolstadt í dag á heimavelli þeirra síðarnefndu.
Alfreð og félagar máttu sætta sig við tap, 2:1, þar sem Moritz Hartmann skoraði fyrir heimaliðið úr vítaspyrnu fimm mínútum fyrir leikslok. Hans fjórða mark úr vítaspyrnu á leiktíðinni.
Augsburg er í 13. sæti af 18 liðum deildarinnar með 21 stig eftir 20 leiki. Ingolstadt er í 9. sæti.