Íslandsmeistarar FH töpuðu 1:0 fyrir Víkingi R. í 21. umferð efstu deildar karla í knattspyrnu í dag. Heimir Guðjónsson, þjálfari FH-inga, var ósáttur við spilamennsku liðsins.
Það var lítið undir fyrir leik þessara liða í dag. FH var þegar búið að tryggja sér Íslandsmeistaratitilinn og Víkingar voru úr leik í baráttunni um Evrópusæti en það var færanýting FH-inga sem varð þeim að falli í dag.
Róbert Örn Óskarsson varði eins og berserkur í Víkinni, en Heimir ræddi við fjölmiðla um leikinn í dag.
„Við fengum nóg af færum en Robbi var var rosalega góður í markinu og við náðum ekki að nýta færin nægilega vel,“ sagði Heimir eftir leik.
„Það var mikið um færi en báðir markverðirnir voru mjög góðir. Það virkaði þannig á mig að þegar komið var í leikinn var erfitt fyrir strákana að gíra sig upp í þennan leik. Varnarlega vorum við ólíkir sjálfum okkur og slitnuðum við of mikið í sundur,“ sagði hann enn fremur.
FH mætir ÍBV í Kaplakrika í síðustu umferð deildarinnar en þar fer bikarinn á loft.
„Við viljum klára tímabilið með stæl og fáum bikarinn afhentan á laugardaginn. Ég get ekki ímyndað mér að það sé gaman fyrir strákana að taka á móti bikarnum og tapa,“ sagði hann að lokum.