Knattspyrnusamband Íslands ætlar að freista þess að fá fleiri konur til að sinna dómgæslu og heldur af þeim sökum dómaranámskeið sem er eingöngu fyrir konur á þriðjudaginn kemur.
Magnús Már Jónsson, dómarastjóri KSÍ, sagði við mbl.is að mikill áhugi væri innan sambandsins fyrir því að auka hlut kvenna á þessu sviði en til þessa hafa fáar konur starfað á þeim vettvangi fótboltans hér á landi.
Námskeiðið fer fram í höfuðstöðvum KSÍ á Laugardalsvelli, hefst klukkan 18 og stendur í tvo tíma. Bríet Bragadóttir og Rúna Kristín Stefánsdóttir, sem hafa starfað sem KSÍ-dómarar um árabil, segja frá reynslu sinni af dómarastörfum og þá verður fyrirlestur um aðstoðardómgæslu.