Íslenska kvennalandsliðið í knattspyrnu mun mæta því brasilíska í vináttuleik á Laugardalsvelli 13. júní. Leikurinn verður sá síðasti sem íslenska liðið leikur, áður en haldið verður á Evrópumótið í Hollandi.
Mbl.is greindi frá þessu í apríl og hefur Knattspyrnusamband Íslands nú staðfest leikinn. Brasilía er með eitt sterkasta landslið heims og situr liðið í 9. sæti heimslista Fifa en Ísland er í 18. sæti listans.
Þjóðirnar hafa aldrei mæst en minnstu munaði að til leiks þeirra kæmi í Algarve-bikarnum í Portúgal í mars 2016 þegar Ísland missti naumlega af því að mæta Brasilíu í úrslitaleik mótsins.
Marta, sem fimm sinnum hefur verið kjörin besti leikmaður heims, er þekktasti leikmaður brasilíska liðsins en hún lék hér á landi með Rosengård gegn Breiðabliki síðasta haust.