Íþróttir | Enski boltinn | mbl | 1.5.2007 | 21:23

Liverpool í úrslitaleik Meistaradeildar Evrópu

Leikmenn Liverpool fagna marki Daniels Aggers í kvöld. Reuters

Liverpool komst í kvöld í úrslitaleikinn í Meistaradeild Evrópu í knattspyrnu með því að sigra Chelsea í vítaspyrnukeppni á Anfield. Liverpool vann leikinn, 1:0, eftir framlengingu, og liðin voru því jöfn, 1:1, þannig að grípa þurfti til vítaspyrnukeppni. José "Pepe" Reina var hetja Liverpool en hann varði vítaspyrnur frá Arjen Robben og Geremi.

Það var Daniel Agger sem skoraði mark Liverpool á 22. mínútu með föstu skoti frá vítateig eftir aukaspyrnu Stevens Gerrards.

Boudewijn Zenden skoraði úr fyrstu vítaspyrnu Liverpool, 1:0.

José Reina markvörður Liverpool varði fyrstu spyrnu Chelsea frá Arjen Robben.

Xabi Alonso skoraði úr annarri vítaspyrnu Liverpool, 2:0.

Frank Lampard skoraði úr annarri vítaspyrnu Chelsea, 2:1.

Steven Gerrard skoraði úr þriðju vítaspyrnu Liverpool, 3:1.

José Reina markvörður Liverpool varði þriðju vítaspyrnu Chelsea, frá Geremi.

Dirk Kuyt skoraði úr fjórðu vítaspyrnu Liverpool, 4:1, og þar með voru úrslitin ráðin. Liverpool fer til Aþenu en Chelsea er úr leik.