Ernst Tanner, íþróttastjóri þýska knattspyrnuliðsins Hoffenheim, segir í viðtali við Daily Star í morgun að til greina komi að selja Gylfa Sigurðsson en til að svo verði þurfi að berast áhugavert tilboð.
Fram til þessa hafi engin tilboð borist í Gylfa sem skorað hefur fimm mörk í níu leikjum með Swansea í ensku úrvalsdeildinni en hann var lánaður til enska úrvalsdeildarliðsins um áramótin.
„Tilboð hafa ekki borist í Gylfa en ef eitthvað kemur og leikmaðurinn hefur áhuga verður það skoðað,“ segir Tanner við Daily Star á Englandi.