Kólumbíski framherjinn Radamel Falcao verður ekki með Manchester United næstu tvær vikurnar eftir að hafa meiðst á ný, en hann hefur verið frá keppni í mánuð vegna kálfameiðsla.
Falcao kom til United í sumar en hefur enn ekki spilað heilan leik fyrir liðið. Hann hefur komið við sögu í fimm leikjum og skorað eitt mark en það var gegn Everton í október.
Mikill fjöldi leikmanna United hefur glímt við meiðsli á tímabilinu og í dag staðfesti Louis van Gaal einnig að Daley Blind yrði frá keppni í þónokkurn tíma, þó að ekki yrðu það sex mánuðir eins og óttast var um tíma.
Uppfært: Manchester United greinir frá því á Twitter-síðu sinni að í raun sé ekki um „ný“ meiðsli að ræða. Van Gaal hafi tekið þannig til orða vegna þess að um kálfameiðslin sé að ræða en ekki hnémeiðslin sem áður plöguðu Falcao.