Enska knattspyrnusambandið hefur ákært bæði Chelsea og Tottenham fyrir að hafa ekki stjórn á leikmönnum sínum í 2:2-jafntefli liðanna í ensku úrvalsdeildinni á mánudagskvöld.
Enska knattspyrnusambandið segir að um þrjú mismunandi tilvik séu að ræða. Í leiknum sjálfum hafi það gerst á 45. og 87. mínútu, og svo einnig eftir að flautað var til leiksloka.
Þá hefur Mousa Dembele, leikmaður Tottenham, verið ákærður fyrir að hafa að því er virtist potað viljandi í auga Diego Costa í leiknum. Atvikið fór framhjá Mark Clattenburg dómara leiksins en sást á sjónvarpsupptöku.
Undir venjulegum kringumstæðum væri Dembele dæmdur í þriggja leikja bann en í yfirlýsingu frá enska knattspyrnusambandinu segir að það sé jafnvel ekki nóg fyrir þetta tilvik. Ekki hefur þó verið gefið út hversu langt bann hann gæti fengið, en félögin hafa fram á föstudag til að svara ákærunum.
Sjá: Fær hann tíu leikja bann? (myndskeið)