Enska knattspyrnusambandið hefur ákveðið að kæra framherjann Andre Gray sem er á mála hjá úrvalsdeildarliðinu Burnley fyrir fordómafull skrif á samfélagsmiðlinum Twitter árið 2012. Þetta staðfestir Knattspyrnusambandið á heimasíðu sinni.
Gray, sem er 25 ára gamall, samdi við Burnley á síðasta ári, en hann átti stóran þátt í því að koma liðinu aftur upp í ensku úrvalsdeildina. Notendur á Twitter fundu gamla færslu frá 2012 þar sem Gray úthúðar samkynhneigðu fólki og segir því að brenna og deyja.
Í færslunni sem hefur nú verið eytt af Twitter stóð:
„Is it me or are there gays everywhere? #Burn #Die #MakeMeSick.“
Gray hefur frest til 31. ágúst til að svara kærunni.